anniversario della firma dello statuto della regione siciliana
martedì 21 novembre 2017   

U STATUTU AUTONOMU
DÂ REGGIONI SICILIANA

Tradotto da Gaetano Cipolla - www.arbasicula.org



Art. 1

A Sicilia cu li isuli Eolii, Egadi, Pelagi, Ustica e Pantiddaria è costituita in Reggioni autonoma aventi personalità giuridica, dintra l’unità politica dû Statu talianu, supra i basi dî principii demucratici ca ispiranu a vita dâ Nazioni. A citati di Palermu è u capulocu dâ Reggioni.

TITULU I

ORGANI DÂ REGGIONI

Art. 2

Organi dâ Reggioni sunnu: l’Assemblea, a Giunta e u Prisidenti dâ Reggioni. U Prisidenti reggionali e a Giunta costituisciunu u guvernu dâ Reggioni.

SEZIONI I

ASSEMBLEA REGGIONALI

Art. 3

L’Assemblea reggionali è costituita di novanta diputati eletti ntâ reggioni a suffraggiu universali direttu e secretu, secunnu a liggi pubblicata di l’Assemblea reggionali in basi a principii stabiluti dâ Costituenti in materia di elezioni pulitichi.

L’Assemblea reggionali veni eletta ogni cincu anni.

Li elezioni dâ nova Assemblea reggionali sunnu stabiluti dû Prisidenti dâ Reggioni non menu di trenta e non cchiù di quarantacincu jorna prima dâ scadenza dî cincu anni e p’un iornu prima dû sissantesimu iornu successivu â scadenza dû periodu di cincu anni.

A nova Assemblea s’havi a riuniri entru i vinti iorna dâ proclamazioni dî vincituri dopu a cunvucazioni dû Prisidenti dâ Reggioni in carica.

I diputati reggionali rapprisentanu l’intera Reggioni.

Art. 4

L’Assemblea reggionali eleggi tra i so membri u Prisidenti, dui ViciPrisidenti, i Secretarii di l’Assemblea e i Cummissioni pirmanenti secunnu i normi dû so regulamentu internu, ca cunteni in chiù i regulamenti supra l’eserciziu dî funzioni relativi a l’Assemblea reggionali.

 Art. 5

I diputati, prima di essiri ammisi a l’eserciziu dî so funzioni, hannu a pristari giuramentu di esercitarili sulu pû scopu dû beni inseparabbili di l’Italia e dâ Reggioni.

Art. 6

I diputati non sunnu processabbili pî voti dunati nta l’Assemblea reggionali e pi li opinioni espressi duranti l’eserciziu dâ so funzioni.

Art. 7

I diputati hannu dirittu a fari interpellanzi, interrogazioni e mozioni dintra di l’Assemblea.

Art. 8

U Cumissariu dû Statu (vidi l’art. 27) pò proponiri u sciugghimentu di l’Assemblea reggionali pi continuati viulazioni dû prisenti Statutu. U dicretu di sciugghimentu havi a essiri pricidutu dâ dilibbirazioni di li Assemblei legislativi dû Statu.

L’amministrazioni ordinaria dâ Reggioni nta stu casu veni cunsignata a na Cummissioni straordinaria di tri membri, numinata dû guvernu naziunali siguennu a designazioni dî stissi Assemblei legislativi.

Tali Cummissioni chiama pi novi elezioni pi l’Assemblea reggionali dopu a fini di tri misi.

SEZIONI II

PRISIDENTI REGGIONALI E GIUNTA REGGIONALI

Art. 9

U Prisidenti e li Assissuri sunnu eletti di l’Assemblea reggionali ntâ so prima siduta, e tra i so membri, â maggiuranza assoluta dî voti secreti dî diputati.

A Giunta reggionali è cumposta dû Prisidenti reggionali e di li Assissuri. Chisti sunnu numinati dû Prisidenti reggionali comu capi dî rami individuali di l’Amministrazioni.

Art 10

In casu di assenza o impedimentu dû Prisidenti reggionali, iddu veni sostituitu di l’Assissuri da iddu numinatu.

In casu di dimissioni, incapacità o morti dû Prisidenti, u Prisidenti di l’Assemblea havi a cunvucari entru chinnici iorna l’Assemblea pi l’elezioni dû novu Prisidenti reggionali.

TITULU II

FUNZIONI DI L’ORGANI REGGIONALI

SEZIONI I

Funzioni di l’Assemblea reggionali

Art. 11

L’Assemblea reggionali è cunvucata dû so Prisidenti in sessioni ordinaria ntâ prima simana di ogni bimestri, e in modu straordinariu, a richiesta dû Guvernu reggionali o di almenu vinti diputati.

Art. 12

L’iniziativa di li liggi reggionali spetta ô Guvernu ed ê so diputati reggionali.

I pruggetti di liggi sunnu elabburati dî Cummissioni di l’Assemblea reggionali câ participazioni dî rapprisintanzi di li interessi prufissiunali e di organi tecnichi reggionali.

I regulamenti pi l’esecuzioni dî liggi furmati di l’Assemblea reggionali sunnu pubblicati dû Guvernu reggionali.

Art. 13

I liggi appruvati di l’Assemblea reggionali e i regulamenti pubblicati dû Guvernu reggionali non si ponnu cunsiddirari pirfetti si ci manca a firma dû Prisidenti reggionali e di l’Assissuri cumpitenti in materia.

I liggi sunnu promulgati dû Prisidenti reggionali, passati i termini di cui a l’art. 29, secunnu comma, e sunnu pubblicati ntâ Gazzetta Ufficiali dâ Reggioni.

Ntrasinu in viguri ntâ Reggioni chinnici iorna dopu a pubblicazioni, salvu diversa dispusizioni cumpresa ntâ liggi o u regulamentu individuali.

Art. 14

L’Assemblea, dintra l’ambitu dâ Reggioni e dintra dî limiti costituzionali dû Statu, senza pregiudizziu dî riformi agrarii e industriali dilibbirati dâ Costituenti dû populu talianu, havi putiri legislativu esclusivu supra i materii siguenti:

Art. 15

I circuscrizioni pruvinciali e li organi e enti pubblichi ca derivanu di iddi sunnu suppressi nta l’ambitu da Reggioni siciliana.

L’ordinamentu di l’enti lucali si basa nta Reggioni stissa supra i Cumuni, supra i libbiri Cunsorzii cumunali, dutati dâ chiù ampia autonomia amministrativa e finanziaria.

Ntô quadru di tali principii generali spetta â Reggioni a legislazionii esclusiva e l’esecuzioni diretta in material di circuscrizioni, ordinamentu e cuntrollu di l’enti lucali.

Art. 16

L’ordinamentu amministrativu di cui a l’articulu pricidenti sarà regulatu in basi ê principii stabiluti ntô prisenti Statutu, dâ prima Assemblea reggionali.

Dintra dî limiti e interessi generali di cui si informa a legislazioni dû Statu, l’Assemblea reggionali pò, cu l’obbiettivu di soddisfari condizioni particulari e interessi propri dâ Reggioni, emanari liggi, puru relativi a l’organizzazioni dî servizi, supra i materii siguenti ca riguardanu â Reggioni:

  1. cumunicazioni, e trasporti reggionali di qualsiasi geniri;
  2. igieni e sanità pubblica;
  3. assistenza sanitaria;
  4. istruzioni media;
  5. disciplina dû creditu, di li assicurazioni e dû risparmiu;
  6. legislazioni sociali: rapporti di travagghiu,
    previdenza e assistenza sociali, osservannu i minimi stabiluti dî liggi dû Statu;
  7. annona;
  8. assunzioni di servizi pubblichi;
  9. tutti l’autri materii ca implicanu servizi di interessi prevalentimenti reggionali.

Art. 18

L’Assemblea reggionali pò fari voti, formulari pruggetti supra li materii di cumpitenza di l’organi dû Statu ca ponnu aviri nu interessi pâ reggioni e prisintarili a li Assemblei legislativi dû Statu.

Art. 19

L’Assemblea reggionale, non chiù tardu dû misi di innaru, approva u bilanciu dâ Reggioni pû prossimu novu periodu, pridispostu dâ Giunta reggionali.

L’eserciziu finanziariu havi a stissa dicurrenza di chidda dû Statu.

U rennicuntu generali dâ Reggioni è suttapostu a l’appruvazioni dâ stissa Assemblea.

SEZIONE II

FUNZIONI DÛ PRISIDENTI E DÂ GIUNTA REGGIONALI

Art 20

U Prisidenti e l’Assissuri Reggionali, oltri ê funzioni esercitati in basi a l’art. 12, 13, comma primu e secunnu, 19, comma primu, hannu ntâ Reggioni funzioni esecutivi e amministrativi riguardanti i materii discritti ntâ l’articuli 14, 15, e17. Supra a l’autri non inclusi ntâ l’articuli 14, 15 e 17, hannu n’attività amministrativa secunnu i direttivi dû Guvernu dû Statu.

Iddi sunnu rispunsabbili di tutti i so funzioni, rispettivamenti davanti a l’Assemblea reggionale e dû Guvernu dû Statu.

Art. 21

U Prisidenti è u Capu dû Guvernu reggionali e rapprisenta a Reggioni.

Ntâ Reggioni iddu rapprisenta puru u Guvernu dû Statu, ca pò in ogni casu mannari tempuraniamenti so Cummissarii pi sbrigari singuli funzioni statali.

Iddu partecipa cû rangu di Ministru ô Cunsigghiu dî Ministri, cu votu dilibbirativu supra i materii ca riguardanu a Reggioni.

Art. 22

A Reggioni havi u dirittu di participari c’un so rapprisintanti, numinatu dû Guvernu reggionali, a la furmazioni dî tariffi ferroviarii dû Statu e a l’istituzioni e regulamentazioni dî sirvizi naziunali di cumunicazioni e trasporti di terra, di mari e aerii, ca ponnu interessari a reggioni.

TITULU III

ORGANI GIURISDIZIONALI

Art. 23

L’organi giurisdizionali cintrali hannu a aviri in Sicilia i Sezioni rispettivi pi l’affari ca riguardanu a Sicilia.

I Sezioni di Cunsigghiu di Statu e dâ Curti dî Cunti hannu a esercitari puru i funzioni rispettivamenti consultivi e di cuntrollu amministrativu e cuntabbili.

I magistrati dâ Curti dî Cunti sunnu numinati, d’accordu, dî Guverni dû Statu e dâ Reggioni.

L’appelli amministrativi, avanzati in linia straordinaria contru atti amministrativi reggionali, sarannu dicisi dû Prisidenti reggionali, dopu consultazioni chî sezioni reggionali dû Cunsigghiu di Statu.

Art 24

E’ istituita a Roma n’Auta Curti cu sei membri e dui supplenti, oltri ô Prisidenti e ô Prucuraturi genirali, numinati in numeru uguali di l’Assemblei legislativi dû Statu e dâ Reggioni, e scigghiuti tra pirsuni di cumpitenza speciali in materia giuridica.

U Prisidenti e u Prucuraturi generali sunu numinati dâ stissa Auta Curti.

A risponsabbilità finanziaria riguardanti l’Auta Curti veni divisa ugualmenti tra u Statu e a Reggioni.

Art. 25

L’Auta Curti giudica supra a costituzionalità:

  1. dî liggi emanati di l’Assemblea reggionali;
  2. dî liggi e dî regulamenti emanati dû Statu,
    rispettu ô prisenti Statutu ed ê fini;
    di l’efficacia di li stissi dintra dâ Reggioni.

Art. 26

L’auta Curti giudica puru supra i reati dû Prisidenti e di l’Assissuri reggionali nta l’eserciziu dî so funzioni discritti ntô prisenti Statutu e accusati di l’Assemblea reggionali.

Art. 27

Nu Cummissariu, numinatu dû Guvernu du Statu, promovi pressu l’Auta Curti i giudizi di cui a li articuli 25 e 26 e nta stu ultimu casu puru in mancanza di accusi pi parti di l’Assemblea reggionali.

Art. 28

I liggi di l’Assemblea reggionali sunnu mannati entru tri ghiorna di l’appruvazioni ô Cummissariu dû Statu, e iddu entru i cincu iorna successivi pò impugnarili davanti a l’Auta Curti.

Art. 29

L’Auta Curti dicidi supra l’impugnazioni entru vinti iorna dâ ricivuta di li stissi.

Si passanu ottu iorna, senza ca u Prisidenti reggionali ricevi copia di l’impugnazioni, oppuri si passanu trenta iorna di l’impugnazioni senza ca u Prisidenti reggionali ricevi a sintenza di annullamentu pi parti di l’Auta Curti, i liggi sunnu promulgati e immediatamenti pubblicati ntâ Gazzetta Ufficiali dâ Reggioni.

Art. 30

U Prisidenti reggionali, puru cu votu di l’Assemblea reggionali, e u Cummissariu di cui a l’art. 27, ponnu impugnari pi incostituzionalità davanti a l’Auta Curti i liggi e i regulamenti dû Statu entru trenta iorna dâ pubblicazioni.

TITULU IV

POLIZIA

Art.31

U Prisidenti reggionali pruvvidi ô mantenimentu di l’ordini pubblicu tramiti a Polizia dû Statu ca dipenni ntâ Reggioni pi disciplina, impiegu e utilizzazioni dû Guvernu reggionali. U Prisidenti dâ reggioni pò richiediri l’usu dî forzi armati dû Statu.

Però u Guvernu dû Statu pò assumiri a direzioni dî sirvizi di pubblica sicurizza, a richiesta dû Guvernu reggionali assemi ô Prisidenti di l’Assemblea, e, in casi ecceziunali di propria iniziativa, quannu fussiru cumprumissi l’interessi generali dû Statu e a so sicurizza.

U Prisidenti havi puru u diritttu di proponiri, cu richiesta mutivata ô Guvernu cintrali, a rimozioni o u traferimentu fora di l’isula dî funzionarii di Polizia.

U Guvernu reggionali pò organizzari corpi spiciali di Polizia amminstrativa pâ difisa di interessi e sirvizi particulari.

TITULU V

PATRIMONIU E FINANZA

Art.32

I beni dû demaniu dû Statu, inclusi l’acqui pubblichi esistenti ntâ Reggioni, sunnu assignati â Reggioni, eccettu chiddi ca interessanu a difisa dû Statu o sirvizi di carattiri naziunali.

Art. 33

Sunnu puru assignati â Reggioni e custituisciunu u so patrimoniu, i beni dû Statu oggi esistenti ntô territoriu dâ Reggioni e ca non sunnu dû tipu di chiddi indicati nta l’articulu pricidenti.

Fannu parti dû patrimoniu indispunibili dâ Reggioni: i furesti, ca a norma dî liggi in materia oggi rapprisentanu u demaniu furestali dû Statu ntâ Reggioni; i mineri, i cavi, i turbieri, quannu a dispunibilità ni veni suttratta ô proprietariu dû funnu; i cosi di interessi storicu, archeologicu, paleontologicu e artisticu, ritruvati di chiunqui e in qualsiasi manera ntô suttaterra reggionali; i costruzioni distinati a sedi di uffici pubblichi dâ Reggioni cu tutti i so arredi e l’autri beni distinati a sirviziu pubblicu dâ Reggioni.

Art. 34

I beni immobili ca si trovanu ntâ Reggioni e ca non hannu proprietari, spettanu di dirittu ô patrimoniu dâ Reggioni.

Art 35

L’impegni già pigghiati dû Statu versu li enti reggionali sunnu mantinuti cu l’adeguamentu ô valuri dâ munita a l’ebbica dû pagamentu.

Art. 36

Ô fabbisognu finanziariu dâ Reggioni si pruvvidi chî redditi patrimoniali dâ Reggioni e tramiti tributi dilibbirati da idda stissa.

Sunnu però risirvati ô Statu l’imposti di produzioni e l’entrati di tabacchi e dû lottu.

Art. 37

Pi li impresi industriali e cummirciali, c’hannu a sedi cintrali fora dû territoriu dâ Sicilia, ma ca hannu in idda stabilimenti e impianti, nta l’accertamentu dî redditi veni determinata a quota dû redditu ca s’havi attribuiri ê stabilimenti e impianti stissi.

Art. 38

U Statu havi a virsari annualmenti a la Reggioni a titulu di solidarietà naziunali, na summa di danari c’havi a essiri utilizzata, secunnu nu pianu ecunomicu, pi fari travagghi pubblichi.

Sta summa havi a circari di bilanzari u minuri ammuntari dî redditi dû travagghiu ntâ Reggioni a paraguni dâ media naziunali.

Ogni cincu anni s’havi a fari na revisioni di st’assegnazioni cu riferimentu ê variazioni dî dati pû pricidenti calculu.

Art. 39

U reggimi duganali dâ Reggioni è di stritta cumpitenza dû Statu.

I tariffi duganali, pi quantu interessa a Reggioni e relativamenti ê limiti massimi, hannu ad essiri stabiluti in basi a na previa consultazioni dû Guvernu reggionali.

Sunnu esenti di ogni daziu duganali i machini e strumenti di travagghiu agriculu, accussì comu u machinariu relativu â trasfurmazioni industriali dî prodotti dâ Reggioni.

Art. 40

I dispusizioni generali supra u cuntrollu dî valuti emanati dû Statu hannu viguri puru ntâ Sicilia.

Però è istituita pressu u Bancu di Sicilia, finu a quannu permani u reggimi vinculisticu supra i valuti, na Camera di cumpinsazioni ô scopu di distinari ê bisogni dâ Reggioni i valuti esteri pruvinienti di l’esportazioni siciliani, dî sordi mannati di l’emigranti, dû turismu e dû guadagnu pi l’affitti di navi reggistrati ntê cumpartimenti siciliani.

Art 41

U Guvernu dâ Reggioni havi a facultà di emettiri prestiti interni.

DISPUSIZIONI TRANSITORII

Art. 42

L’Autu Cummissariu e a Consulta reggionali dâ Sicilia, inclusi i tecnici, restanu in carica chî funzioni attuali finu â prima elezioni di l’Assemblea reggionali, ca avrà locu a cura dû Guvernu dû Statu entru tri misi di l’appruvazioni dû prisenti Statutu, in basi a liggi elettorali dû Statu c’havi a essiri emanata.

I circuscrizioni dî culleggi elettorali sunnu novi, in currispunnenza cu l’attuali circuscrizioni pruvinciali e dividennu u numiru dî diputati in basi â popolazioni di ogni circuscrizioni.

Art. 43

Na Cummissioni paritetica di quattru membri numinati di l’Autu Cummissariu dâ Sicilia e dû Guvernu dû Statu havi a determinari i normi transitorii relativi ô passaggiu di l’uffici e dû pirsunali dû Statu â Reggioni, e i normi pi l’attuazioni dû prisenti Statutu.